Горнай улууhугар культура салаата тэриллибитэ 70 сыла

Муус устар 14 күнүгэр, Горнай улууhугар культура салаата тэриллибитэ 70 сылын бэлиэтиир үөрүүлээх тэрээһиннэр ыытылынна. Тэрээһин саҕаланыыта сахалыы сиэринэн, арыылаах алаадьынан кэлбит ыалдьыттары көрүстүлэр.

М.Е.Тимофеев аатынан Бэрдьигэстээхтээҕи кыраайы үөрэтэр түмэлигэр «Саха үгэһин тыыннаах ситимэ» култуура тэрилтэлэрин ситиһиилэрин кэпсиир, үлэлэрин сырдатар стендалар уонна наҕараадалар турдулар. Улуус баһылыгын  солбуйааччыта Павел Петров, улуустааҕы култуура уонна духуобунай сайдыы управлениетын начаалынньыга Тамара Кесарева, кыраайы үөрэтэр түмэл дириэктэрэ Елена Винтоняк, култуура бэтэрээннэрэ истиҥ үтүө тылларын эттилэр, урукку сыллары ахтан- санаан ыллылар. Ону тэҥэ Семен уонна Софрон Даниловтар ааттарынан Духуобунас киинигэр «Грани таланта» култуура үлэһиттэрин быыстапка коллекциятын үөрүүлээх арыллыыта буолла.

Күнүс 16:00 чаастан Мэхээлэ Дьөгүөрэп аатынан Сынньалаҥ киинигэр култуура салаата 70 сылынан үөрүүлээх кэнсиэр ыытылынна. Ил Түмэн наукаҕа, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэргэ сис кэмитиэт бэрэссэдээтэлэ Феодосия Габышева,улуус баһылыга Никита Андреев, Бэрдьигэстээх нэһилиэгин баһылыга Алексей Аргунов, улуус депутаттарын сэбиэтин бэрэссэдээтэлэ Алквиад Тарасов култуура эйгэтин үлэһиттэригэр үрдүк наҕараадалары туттардылар. Тэрээһин ырыа-үҥкүү аргыстаах дьоро киэһээтэ “Нарыйаана” кафеҕа түмүктэннэ.